नवी दिल्ली : ‘देशाचे पहिले पंतप्रधान आणि आयर्न लेडी इंदिरा गांधी यांच्यानंतर सध्याचे पंतप्रधान नरेंद्र मोदी यांचा सर्वांत यशस्वी पंतप्रधानांच्या यादीत क्रमांक लागू शकतो,’ असे मत आंतरराष्ट्रीय ख्यातीचे विचारवंत डॉ. रामचंद्र गुहा यांनी व्यक्त केले. ‘मोदींच्या करिष्म्याला जाती आणि भाषांच्या मर्यादा राहिलेल्या नाहीत,’ असेही ते म्हणले. ‘लंडन स्कूल ऑफ इकॉनॉमिक्स इंडिया समिट २०१७’मध्ये ते बोलत होते.
‘पंतप्रधान मोदी यांची कारभारावरील हुकूमत आणि त्यांचा अखिल भारतीय दृष्टिकोन त्यांना नेहरू आणि इंदिरा गांधींच्या पंक्तीत नेऊन बसवतो. नेहरू आणि इंदिराजींनंतर इतकी पकड असणारा पंतप्रधान झालेला नाही. ज्याच्या लोकप्रियतेला जाती, भाषा, प्रादेशिकतेच्या मर्यादा नाहीत, असा पंतप्रधान झाला नाही. हेच साम्य मोदींना नेहरू आणि इंदिराजींनंतरचे यशस्वी पंतप्रधान बनवतात,’ असे डॉ. गुहा म्हणाले.
या वेळी भारतीय राजकारणाच्या इतिहासावर भाष्य करताना गुहा यांनी जाती प्रथा आणि महिलांना सापत्न वागणूक या बाबी निर्विवाद खऱ्या असल्याचे नमूद केले. डॉ. गुहा हे मोदींचे टीकाकार म्हणून ओळखले जातात. त्यांनी मोदींच्या विरोधात अनेकदा भाष्य केले आहे. तसे केल्याने आपल्याला धमक्यांचे ई-मेल आले, असेही ट्विट त्यांनी केले होते.
